7 წლის კოლინ კოქსი და რაიან ბრანსონი 2 წელია ერთად სწავლობენ და უკვე საუკეთესო მეგობრები არიან. როდესაც რაიანმა ხანძრის დროს სახლთან ერთად საყვარელი ნივთები დაკარგა, ერთგულმა კოლინმა გადაწყვიტა მეგობარს დახმარებოდა.

რამდენიმე კვირის წინ, როდესაც რაიანი სკოლაში მოწყენილი მივიდა, კოლინმა გაიგო რომ მისმა საუკეთესო მეგობარმა ყველაფერი დაკარგა: საწოლი, ტანსაცმელი, წიგნები, სათამაშოები.. სახლში დაბრუნებულმა კოლინმა დედას სთხოვა, შეიძლებოდა თუ არა, რომ ვიდეო მიმართვა ჩაეწერა, სადაც ადამიანებს სთხოვდა რაიანის დასახმარებლად ფული შეეგროვებინათ და შემდეგ დედას ეს ვიდეო Facebook-ზე გამოექვეყნებინა.

"ადრე როდესაც კოლინს სურათებს ვუღებდი, მთხოვდა არ გამომექვეყნებინა Facebook-ზე, ის ხვდებოდა რომ სოციალური ქსელი ინფორმაციის გავრცელების წყაროა. ამიტომ, როდესაც ის სახლში სევდიანი მოვიდა, მეგობარზე მომიყვა და თავისი იდეა გამაცნო, არ გავოცებულვარ." - ყვება ბიჭუნას დედა.

კოლინის ვიდეოს გავრცელების შემდეგ ოჯახის დახმარების მსურველი უამრავი ადამიანი გამოჩნდა. რაიანის ოჯახის ანგარიშზე უკვე 11 ათას დოლარზე მეტია შეგროვებული.

ვიდეო გამოქვეყნების შემდეგ წმინდა ლუისის ტელევიზიამაც აჩვენა და 7 წლის ბიჭების საოცარი მეგობრობის ისტორია გაავრცელა. ამის შემდეგ, რაიანის ოჯახს უკვე ეხმარებიან ახალი ნივთებით, პატარა ბიჭუნას კი სათამაშოებს უგზავნიან, რომლებსაც რაიანი ყველაზე ერთგულ მეგობარს უზიარებს.