12:25 PM გადავარჩინოთ 16 წლის ნინო ჭყონია! / gadavarchinot 16 tsclis nino chkonia! | |||||||||||||
|
"ექიმები ყველა ღონეს ხმარობენ პაციენტის მდგომარეობის გასაუმჯობესებლად" 16 წლის ნინო ჭყონიას საზოგადოების დახმარება სჭირდება. ზაქარია ფალიაშვილის სახელობის ცენტრალური სამუსიკო სკოლის -"ნიჭიერთა ათწლედის" მე-9 კლასის მოსწავლეს უმძიმესი დაავადება -თავის ტვინის IV პარკუჭის ავთვისებიანი სიმსივნე დაუდგინდა. ნინოს თბილისის ცენტრალური საავადმყოფოს ნეიროქირურგიულ განყოფილებაში რამდენიმე ურთულესი ოპერაცია ჩაუტარდა. ამჟამად რეანიმაციულ განყოფილებაში, აპარატულ სუნთქვაზე იმყოფება და მიუხედავად იმისა, რომ ექიმები ყველა ღონეს ხმარობენ პაციენტის მდგომარეობის გასაუმჯობესებლად, დიაგნოზის სირთულიდან გამომდინარე, ჯერჯერობით ეს ვერ ხერხდება. ნინოს ხანგრძლივი, ინტენსიური მკურნალობა, სხივური თერაპია, ოპერაციული ჩარევა და მთელი რიგი პროცედურები სჭირდება, რაც დიდ თანხებთანაა დაკავშირებული. ნინოს დახმარების მიზნით, ქართული მუსიკალური საზოგადოება გაერთიანდა და სამუსიკო სკოლის ორგანიზებით, 10 იანვარს, კონსერვატორიის დიდ საკონცერტო დარბაზში ნინო ჭყონიას მხარდასაჭერი საქველმოქმედო აქცია-კონცერტი გაიმართა. თამუნა მიქაძე, სამუსიკო სკოლა "ნიჭიერთა ათწლედის" საზოგადოებასთან ურთიერთობის მენეჯერი, კონსერვატორიის ლექტორი, კონცერტის ორგანიზატორი: -მიუხედავად იმისა, რომ ამ კონცერტის ორგანიზება ორ კვირაში მოხდა, თანაც ახალ წელს დაემთხვა და სხვა ბევრი საქველმოქმედო კონცერტი უძღოდა წინ, შედეგით ძალზე კმაყოფილები ვართ. საუკეთესო შემსრულებლები მონაწილეობდნენ და სიამოვნებით დაგვთანხმდნენ მონაწილეობას. "ნიჭიერთა ათწლედს" თითქმის საუკუნოვანი ისტორია აქვს და ყველა ის მუსიკოსი, რომელიც საზოგადოებისთვის კარგად ცნობილი და საყვარელია არა მარტო საქართველოში, არამედ მის ფარგლებს გარეთაც, ამ სამუსიკო სკოლის კურსდამთავრებულია. "ათწლედელებს" ყოველთვის ერთიანი სულისკვეთება აქვთ და როცა რამე გვჭირდება, უკან არ იხევენ. როგორც კი დავურეკეთ, ერთი წუთითაც არ უფიქრიათ, ისე დაგვთანხმდნენ და უღრმესი მადლობა მათ, რადგან მათი მხარდაჭერა უმნიშვნელოვანესი იყო. გარკვეული თანხა, რასაკვირველია, შემოვიდა, თუმცა ნინოს გამოსაჯანმრთელებლად ეს საკმარისი არ არის. უბრალოდ, ეს იყო მუსიკოსების გაერთიანება და სოლიდარობა, რომ ნინო ჭყონიას ოჯახს მხარში ამოვდგომოდით. დღევანდელი მონაცემებით, დავალიანება 15 ათასია, რადგან ნინო რეანიმაციაში წევს. როგორ იქნება და რა თანხები და პროცედურები დასჭირდება მომავალში, ცალკე საკითხია. ჯანდაცვის სამინისტროს მიერ გამოყოფილი გრანტების ლიმიტიც ამოიწურა. იმ ეტაპზე მოთხოვნილი თანხა "სოლიდარობის ფონდმაც" დარიცხა. სხვათა შორის, კონცერტში მონაწილეობის სურვილი სხვა მუსიკოსებმაც გამოთქვეს, მაგრამ ყველა მათგანის ჩართვა ვერ მოხერხდა, ამიტომ, იმედი მაქვს, დამატებით, კიდევ ერთ კონცერტს გამართავენ. იმ მუსიკოსებმა, რომლებიც საქართველოში არ იმყოფებიან, ანგარიშზე თანხები გადარიცხეს. ნინი მიქაძე, ნინოს მეგობარი: -მე და ნინო ბავშვობის მეგობრები ვართ, ერთ სკოლაში დავდივართ და 11 წელია ვმეგობრობთ. ის მართლაც განსაკუთრებული ადამიანია, კეთილი და მოსიყვარულე, ყველას მიმართ თბილი, მასწავლებლებთანაც შესანიშნავი ურთიერთობა აქვს და კარგი მოსწავლეა, სწავლას ძალიან შემართებით უდგება. -როდის გაიგეთ, რომ ეს დაავადება ჰქონდა? მანამდე რაიმე აწუხებდა? -სხვათა შორის, არა. როგორც ჯანმრთელ ადამიანს შეიძლება ასტკივდეს თავი ხანდახან, ნინოსაც ისე მოსვლია, საგანგაშო არაფერი ჰქონდა. დაავადების შესახებ ოქტომბრის დასაწყისში შევიტყვეთ. ტომოგრაფიული გამოკვლევის შემდეგ აღმოაჩინეს, რომ 4-სანტიმეტრიანი ავთვისებიანი სიმსივნე ჰქონდა. ექიმები კარგად უვლიან და ძალისხმევას არ იშურებენ. მართალია, ჯერ ისევ მძიმე მდგომარეობა აქვს, მისი ორგანიზმი ძალიან დასუსტებულია, მაგრამ როგორც ამბობენ, რაღაც პროგრესი მაინც არის. ცოტა ხნით პალატაშიც იყო გადაყვანილი, თუმცა ახლა ისევ რეანიმაციაშია. იქ რამდენიმე დღე დარჩება ექიმების დაკვირვების ქვეშ. მხოლოდ ოპერაციის დღეს მიხვდა, რომ რაღაც პრობლემა ჰქონდა. მანამდე აქეთ გვამხნევებდა, -საშიში არაფერი მჭირს და არ ინერვიულოთო. ნინოს მხარდასაჭერი კონცერტი მაღალ დონეზე ჩატარდა, გარკვეული თანხაც შეგროვდა, რაც მის დასახმარებლად ნამდვილად მნიშვნელოვანია. -რაიმე სხვა გზებსაც თუ მიმართეთ ნინოსთვის თანხის მოსაძიებლად? -დიახ. ოპერაციის შემდეგ, კლასმა გადავწყვიტეთ, რომ ფული რამენაირად გვეშოვა. ყველა ხერხი ვცადეთ, სადარბაზოებში, კარდაკარ დავდიოდით, ბევრი ვერაფერი შევაგროვეთ, მაგრამ რაც იყო, რეანიმაციის გარკვეული დღეების დასაფარავად გამოადგათ. გარდა ამისა, ორი გამოფენა ჩავატარეთ და იქიდანაც ნორმალური თანხა შევაგროვეთ. არ დავნებებულვართ და ბოლომდე ვიბრძვით. უდიდესი მადლობა ყველას, ვინც მხარში ამოგვიდგა! ეს ახლა ყველაზე მნიშვნელოვანია ჩემთვის, ჩემი მეგობრებისთვის და, რა თქმა უნდა, ნინოსთვის. "ნიჭიერთა ათწლედის" ადმინისტრაციის გადაწყვეტილებით, ნინო ჭყონიას დასახმარებლად სპეციალური ანგარიში გაიხსნა. ანგარიშის ნომერია: საქართველოს ბანკი GE25BG0000000603332600 მიმღები: მედეა ქირია თამთა დადეშელი
| გამოხატეთ თქვენი მოსაზრება მოცემულ მასალაზე - კომენტარის სახით.მიმაგრება: სურათი 1
|
გაეცანით მსგავს მასალებს ტეგების მიხედვით
Загрузка...
| |||||||||||
