პანიკური შეტევა გახლავთ მდგომარეობა, რომლის დროსაც მოულოდნელად შფოთვა და შიში გატყდებათ თავს. ის ადამიანებში არა მხოლოდ ემოციურ, არამედ ფიზიკურ დონეზეც ვლინდება. მაგალითად, ხშირად მას თან ახლავს სუნთქვის გაძნელება, ოფლიანობა, კანკალი, აჩქარებული გულისცემა, გულმკერდის არეში ტკივილი, თავბრუსხვევა და ა.შ.

სტატიაში გთავაზობთ 10 რჩევას, რომელიც პანიკურ შეტევასთან გამკლავებაში დაგეხმარებათ, როგორც მომენტალურად, ასევე, ხანგრძლივ პერსპექტივაში.

1. მიმართეთ სპეციალისტს
კოგნიტიურ-ბიჰევიორული თუ სხვა სახის თერაპია პანიკური აშლილობის მქონე პაციენტებს მდგომარეობიდან გამოსვლაში ძალიან ეხმარება. აქედან გამომდინარე, სპეციალისტთან ვიზიტი უპირველესი და ერთ-ერთი უმნიშვნელოვანესი ნაბიჯია, რომელიც საკუთარი მენტალური ჯანმრთელობის შესანარჩუნებლად უნდა გადადგათ.

თერაპევტი ხელს შეგიწყობთ, რომ ამ გამოწვევას ეფექტიანად შეებრძოლოთ. კვლევებმა ისიც კი აჩვენა, რომ კოგნიტიურ-ბიჰევიორული მიდგომა პაციენტების ტვინის იმ რეგიონზე ახდენს გავლენას, რომელიც პანიკური შეტევის სიმპტომებზეა პასუხისმგებელი.

შედეგიანია ყურადღების კონცენტრაციაზე დაფუძნებული მკურნალობაც. სამხრეთ კორეაში ჩატარებული კვლევა ცხადყოფს, რომ მსგავსი სახის მცირეხნიანი პროგრამის გავლის შემდგომ, პაციენტებმა საკუთარი თავის გაკონტროლება შეძლეს. ეს კიდევ ერთხელ უსვამს ხაზს, თუ რამხელა წინსვლის საშუალებას იძლევა თერაპია.

2. მიიღეთ მედიკამენტები
მედიკამენტები მდგომარეობას საგრძნობლად შეგიმსუბუქებთ, თუმცა მკურნალობის ამ მეთოდს თვითნებურად არ უნდა მიმართოთ. საჭირო პრეპარატებს სპეციალისტი დაგინიშნავთ, თუ ამას საჭიროდ მიიჩნევს.

პანიკური შეტევის სიმპტომების აღმოსაფხვრელად ხშირად გამოიყენება ბენზოდიაზეპინის ტიპის ფსიქოაქტიური საშუალებები. როგორც წესი, მათ პაციენტებს დიდი ხნით არ უნიშნავენ, რადგან დამოკიდებულების გამოწვევის რისკი არსებობს. აქედან გამომდინარე, მსგავსი მედიკამენტების მიღება უშუალოდ კრიზისის დროსაა რეკომენდებული. ასევე, ისინი ურეცეპტოდ არ გაიცემა, ამიტომ, პირველ რიგში, დიაგნოზის დასმაა აუცილებელი. ხანგრძლივი გამოყენებისთვის, უმეტესწილად, ანტიდეპრესანტებს მიმართავენ, მათ შორის შფოთვის საწინააღმდეგო პრეპარატებს.

3. ისუნთქეთ ღრმად
ღრმად სუნთქვა პანიკის დაძლევაში დაგეხმარებათ. კვლევებით დადგინდა, რომ ეს კონცენტრაციასა და ემოციურ კეთილდღეობას აუმჯობესებს. მცირდება სტრესის დონეც, რასაც ცდისპირთა სისხლში ჰორმონ კორტიზოლის დაბალი დონე ადასტურებს.

მეცნიერთა განცხადებით, იგივე შედეგი აქვს ნელა სუნთქვასაც, რომლის მეშვეობითაც სიმშვიდისა და კომფორტის განცდა გვეუფლება, დაბნეულობა, შფოთვა და სიბრაზე კი იკლებს.

სუნთქვის კონტროლით ჰიპერვენტილაციის რისკსაც ამცირებთ. შეეცადეთ, პირით 4 თვლაზე ჩაისუნთქოთ და იგრძნოთ, როგორ ივსება თქვენი ფილტვები ჰაერით, წამით შეჩერდით, შემდეგ კი ისევ 4 თვლაზე ამოისუნთქეთ. ეს შვებას ნამდვილად მოგგვრით.

4. გაიაზრეთ, რომ პანიკური შეტევა გაქვთ
ზოგჯერ პანიკური შეტევის სიმპტომები ძალიან ჰგავს ინფარქტისას, რაც სიტუაციას აუარესებს. ამ დროს საკუთარ თავს უნდა შეახსენოთ, რომ ეს ყველაფერი დროებითია, მალე გაივლის და კარგად გახდებით.

ეცადეთ, რომ მსგავსი მდგომარეობისთვის დამახასიათებელი სიკვდილის უსაფუძვლო შიში განდევნოთ, რადგან ეს ნამდვილად არ გემუქრებათ. ასევე, ეცადეთ, თავიდან აიცილოთ ყველაფერი, რაც თქვენთვის პანიკური შეტევის მაპროვოცირებელია. მიზეზების ძიება დაგეხმარებათ გაიაზროთ, რასთან გაქვთ საქმე. დახუჭეთ თვალები, რათა დამშვიდებაში ხელი არაფერმა შეგიშალოთ.

5. იმუშავეთ ყურადღების მოკრებაზე
პანიკურ შეტევას რეალობისგან მოწყვეტის განცდა ახლავს თავს. ამას შეგიძლიათ სწორედ ყურადღების მოკრებით შეეწინააღმდეგოთ. ფოკუსირდით აწმყოზე, იფიქრეთ თქვენს ემოციურ მდგომარეობაზე და სტრესის შესამცირებლად მედიტაცია სცადეთ.

კონცენტრირდით ნაცნობ ფიზიკურ შეგრძნებებზე, ხელით შეეხეთ ტანისამოსს ან ძირს დადგით ფეხი, რათა სიმყარე იგრძნოთ. ამოირჩიეთ ნებისმიერი ნივთი და მას დააკვირდით, დაათვალიერეთ ყოველი დეტალი. მაგალითად, თვალი მიადევნეთ საათის ისარს, იფიქრეთ მის ფორმაზე, ფერზე, ზომასა და მოძრაობაზე.

6. მოადუნეთ კუნთები
კუნთების დაძაბულობა შფოთვის ერთ-ერთი ნიშანია, რომელსაც მათი მოდუნებით შეებრძოლებით. ეს არა მხოლოდ სხეულის ცალკეულ ნაწილებზე, რამედ მთელ ორგანიზმზე ახდენს დადებით გავლენას.

ამისთვის შეგიძლიათ სპეციალურ თერაპიაზეც ჩაეწეროთ, სადაც კუნთოვანი ქსოვილის მოდუნების სხვადასხვა ტექნიკას გასწავლიან. პირველ ეტაპზე, სასურველია, კუნთების კონკრეტული წყება მოადუნოთ, შემდეგ კი უფრო ფართო არეალზე გადახვიდეთ. გაითვალისწინეთ, რომ წინასწარი მცდელობით ზემოხსენებული ტექნიკების ეფექტიანობაც გაიზრდება.

7. გზა გაუხსენით წარმოსახვას
კვლევებით დადგინდა, რომ ბუნებაში მეტი დროის გატარება და ამაზე ფიქრიც კი შფოთვის დაძლევაში გვეხმარება.

სიმშვიდის მოსაპოვებლად წარმოიდგინეთ ადგილი, რომელიც თქვენთვის კომფორტთან, სიწყნარესთან და ბედნიერებასთან ასოცირდება, იქნება ეს სანაპირო, ტყეში მდგარი მყუდრო ქოხი თუ სხვა. ეცადეთ, რომ წარმოსახვა მაქსიმალურად დეტალური იყოს და მასში თქვენც მონაწილეობდეთ, მაგალითად, გაიხსენოთ ფიჭვის სუნი ან ის, თუ როგორია ცხელ ქვიშასთან შეხება.

8. ივარჯიშეთ
გახსოვდეთ, რომ ვარჯიში მხოლოდ ფიზიკურ კეთილდღეობას არ განაპირობებს და მენტალურ ჯანმრთელობაზეც მოქმედებს. ექსპერტთა განცხადებით, კვირაში 3-ჯერ, 20-წუთიანი ფიზიკური აქტივობა შფოთვას ამცირებს.

ამის მიუხედავად, სასურველია, ვარჯიშის დაწყებამდე ექიმთან კონსულტაცია გაიაროთ, რადგან ზოგჯერ ცხოვრების წესის მოულოდნელად და რადიკალურად შეცვლა, მდგომარეობას აუარესებს.

9. იქონიეთ ლავანდა
ყველასთვის კარგად ცნობილი მცენარე ლავანდა იგივე ფრანგული ნარდი, სტრესის შესამსუბუქებელი ტრადიციული საშუალებაა. მისი დამამშვიდებელი ეფექტი მეცნიერულადაცაა დადასტურებული.

მოიმარაგეთ პროდუქტები, რომლებიც ლავანდის ეთერზეთს შეიცავს, მაგრამ მათ გამოყენებამდე გაეცანით ინსტრუქციას, რადგან ზოგიერთ მედიკამენტთან ერთად მიღებისას ის ძილიანობას იწვევს.

10. იმეორეთ მანტრა
დაბოლოს, პანიკური შეტევისას გონებაში იმეორეთ მანტრა, რომელიც დაგამშვიდებთ. შეარჩიეთ ის სიტყვები, რომლებიც ყველაზე მეტად გეხმარებათ, მაგალითად: “ყველაფერი მალე გაივლის”. ეს წინადადება იმდენჯერ წარმოთქვით, რამდენჯერაც საჭირო იქნება, სანამ შვებას იგრძნობთ.

რუბრიკის სპონსორია ექიმო. ექიმო არის აპლიკაცია, რომელიც სამედიცინო სერვისების მიღებას გიმარტივებთ. მისი გამოყენებით, შეძლებთ სახლში გამოიძახოთ ლაბორატორიული ანალიზები, დაჯავშნოთ ექიმთან ვიზიტი, რიგში დგომის გარეშე მიიღოთ სამედიცინო მომსახურება, მოძებნოთ მედიკამენტები და ელექტრონულად მიიღოთ კვლევებისა და მედიკამენტების დანიშნულებები, დიაგნოზები და სადაზღვევო მიმართვები.